Saturday, 6 June 2020

ಸ್ತ್ರೀ ಸಮಾನತೆ, ಸ್ವಾತಂತ್ರ್ಯ? (Stre Samanate, Svatantrya?)

ಲೇಖಕಿ ; ಡಾ. ಯಶಸ್ವಿನೀ
(ಪ್ರತಿಕ್ರಿಯಿಸಿರಿ lekhana@ayvm.in)



ಹೆಣ್ಣು ಸಮಾಜದ ಕಣ್ಣು. ಸ್ತ್ರೀ ಇರುವ ಮನೆ ಅಚ್ಚುಕಟ್ಟಾಗಿ ಇರುತ್ತದೆ. "ಗೃಹಿಣೀ ಗೃಹಮುಚ್ಯತೇ". ನಮ್ಮ ಸಂಸ್ಕೃತಿಯಲ್ಲಿ ಹೆಣ್ಣಿಗೆ, ಅವಳ ವಿಶೇಷತೆಗಳನ್ನು ಗಮನಿಸಿ ಅದಕ್ಕೆ ತಕ್ಕುದಾದ ವಿಶೇಷ ಗೌರವ, ಜವಾಬ್ದಾರಿಗಳನ್ನು ವಹಿಸಿದ್ದಾರೆ. "ಯತ್ರ ನಾರ್ಯಸ್ತು ಪೂಜ್ಯಂತೆ,ರಮಂತೇ ತತ್ರ ದೇವತಾಃ ಎಂಬ ಪ್ರಸಿದ್ಧವಾದ ವಾಕ್ಯವೇ ಇದೆ. ಶಿಕ್ಷಣವಿಲ್ಲದೆ ಸ್ವೇಚ್ಛೆಯಿಂದ ವರ್ತಿಸುವುದು ಎಂದೂ ಸ್ವಾತಂತ್ರ್ಯವಾಗದು. ಸ್ವಾತಂತ್ರ್ಯ ತನಗೇ ನಿಸರ್ಗದತ್ತವಾಗಿ ಬಂದ ತಂತ್ರ. ಅದರಂತೆ ನಡೆಯುವುದೇ ನಿಜವಾದ ಸ್ವಾತಂತ್ರ. ಪುರುಷ ಒಂದು ಬಗೆಯ ಶರೀರ ಮನಸ್ಸುಗಳನ್ನು ಹೊತ್ತು ಬಂದಿದ್ದಾನೆ, ಸ್ತ್ರೀ ಇನ್ನೊಂದು ಬಗೆಯ ದೇಹ, ಮನಸ್ಸುಗಳನ್ನು ಹೊಂದಿ ಬಂದಿದ್ದಾಳೆ. ಅದರಂತೆ ನಿರ್ವಹಿಸುವ ಕೆಲಸವೂ ಕೆಲವೊಮ್ಮೆ ಬೇರೆ ಬೇರೆಯಾಗಿರುತ್ತವೆ. ಇಬ್ಬರ ಸಮಾನತೆ ಎನ್ನುವುದು ಬರಿಯ ಅಸಹಜವಾದ ಘೋಷಣೆ ಅಷ್ಟೇ. ಇಬ್ಬರೂ ಅವರವರಿಗೆ ಒದಗಿಬಂದ ಸೌಲಭ್ಯಕ್ಕನುಗುಣವಾಗಿ ಒಂದು ಒಳ್ಳೆಯ ಜೀವನವನ್ನು ನಿರ್ವಹಿಸುವಂತಾಗುವುದೇ ಸಹಬಾಳ್ವೆ. ಅವನ ಉಡುಪನ್ನು ಇವಳು ಧರಿಸುವುದು. ಇವಳ ಸೀರೆಯನ್ನು ಅವನು ಉಡುವುದು ಎಂದಲ್ಲ ಸಮಾನತೆ ಎಂದರೆ. 

"ಶಿವ ಶಕ್ತ್ಯಾತ್ಮಕಂ ಇದಂ ಜಗತ್ "  ಶಿವಶಕ್ತಿಯರು ಸೇರಿಯೇ ಸೃಷ್ಟಿ ಎಲ್ಲವೂ.  ಸ್ತ್ರೀ  ಶಕ್ತಿ  ಸ್ವರೂಪಪಿಣಿ.  ಇದು ಭಾರತೀಯರ ದೃಷ್ಟಿಕೋನ. ಇಲ್ಲಿ ನಾ ಹೆಚ್ಚು ನೀ ಕಡಿಮೆ ಎಂಬ ಪ್ರಶ್ನೆ ಇಲ್ಲ.  ಪುರುಷ ಮತ್ತು ಸ್ತ್ರೀ
ಇಬ್ಬರು ಸಹ ಯೋಗ-ಭೋಗಮಯವಾದ ಜೀವನವನ್ನು ನಡೆಸಲು ಪರಸ್ಪರ ಒಬ್ಬರನ್ನೊಬ್ಬರು ಅವಲಂಬಿಸಿದ್ದಾರೆ  ಒಬ್ಬರ ಅವಶ್ಯಕತೆಯನ್ನು ಇನ್ನೊಬರು ಪೂರೈಸಬಲ್ಲರು. ಪರಮಾರ್ಥವನ್ನು ಸಾಧಿಸಬಲ್ಲರು. ಇದಕ್ಕಗಾಗಿಯೇ ಗೃಹಸ್ಥಾಶ್ರಮ-ವಿವಾಹವೆಂಬ ಪದ್ಧತಿಯು ಇರುವುದಾಗಿದೆ. ಹೀಗಿರುವಾಗ, ಈ ಘಟ್ಟದಲ್ಲಿ ಒಬ್ಬರನ್ನೊಬ್ಬರು ಪೂಜ್ಯ ಭಾವದಿಂದ, ಅನ್ಯೋನ್ಯವಾಗಿ ಭಾವಿಸುವುದು ಮುಖ್ಯ. ಪ್ರವಚನಗಳ, ಒಳ್ಳೆಯ ಕೆಲಸಗಳ ಆರಂಭ ಮಾಡುವ ಮುನ್ನ ಸ್ತ್ರೀ ಹಸ್ತದಿಂದ ದೀಪ ಬೆಳಗಿಸುವ ಮೂಲಕ ವಿದ್ಯಾ ದೇವಿಯ ಅನುಗ್ರಹವನ್ನು ಪಡೆಯಬೇಕು ಎಂಬುದು ಶ್ರೀರಂಗ ಮಹಾಗುರುಗಳ ಪಾಠವಾಗಿತ್ತು. ಹೀಗೆ ಸ್ತ್ರೀ ಪುರುಷರು ಪರಸ್ಪರ ಸ್ಪರ್ಧಾ ಮನೋಭಾವವನ್ನು ತ್ಯಜಿಸಿ ಸಹಕಾರ ಭಾವದಿಂದ ಒಳ್ಳೆಯ ಮನಸ್ಸು, ಮನೆ, ಕುಟುಂಬ, ಸಮಾಜ, ರಾಷ್ಟ್ರ ನಿರ್ಮಾತೃಗಳಾಗ ಬೇಕೆಂಬುದು ಭಾರತೀಯರ ಚಿಂತನೆಯಾಗಿದೆ.

ಸೂಚನೆ: 3/06/2020 ರಂದು ಈ ಲೇಖನ ಉದಯವಾಣಿ ಯಲ್ಲಿ ಪ್ರಕಟವಾಗಿದೆ.


To know more about Astanga Yoga Vijnana Mandiram (AYVM) please visit our Official Website, Facebook and Twitter pages